കൃത്യതയെന്നത് ചെറിയകാര്യത്തിലും
സംതൃപ്തിയുളവാക്കുമെന്നതറിക
ഉൽസുകനെങ്കിലോ കണ്ടെത്തിടും മാർഗ്ഗം
ഇല്ലെങ്കിലോ സ്വയമുണ്ടാക്കിടുമവൻ
നിശ്ശബ്ദതയും ക്ഷമയുമൊരുപോലെ
നിസ്സംശയം രണ്ടു ഊർജ്ജത്തിനുറവിടം
നിശ്ശബ്ദത ബുദ്ധിപരമാമൂർജ്ജവും
നിസ്തുലമാം ക്ഷമ വികാരപരവും
അറിയില്ലേതു കാൽവയ്പ്പായിരിക്കാം
അറിയാതെ ജീവിതം മാറ്റിമറിക്കുക
മുന്നോട്ട് പോകയതിനാൽ, സന്തോഷവു-
മനുഗ്രഹോമെത്താം നിനച്ചിരിയാതെ
ഒരു കാരണം കാണാമെന്ത് നടക്കാനും
ഒരു നാളെല്ലാമേ പൂർണ്ണതയിലെത്താം
ഇന്നു കണ്ണീരിലൂടതിനാൽച്ചിരിക്കാം ഇന്നത്തെയമളികളോർത്തും ചിരിക്കാം
ബധിരർക്കു കേൾക്കാം ദയയെന്ന ഭാഷ
അന്ധർക്കുമതുപോലെയാഭാഷകാണാം.
മറ്റുള്ളവരിലെയഴക് വെളിവാക്കും
മർത്യനാണേറ്റവുമഴകുള്ള വ്യക്തി
ഒരുചെറിയ പദമാകാം വിശ്വാസമെന്നത്
ഒരുപാടുൽകൃഷ്ടമാം ധ്വനികളുണ്ടതിന്
വിശ്വാസത്തിൽ നമുക്കവിശ്വാസവുമ-
വിശ്വാസത്തിൽ നല്ലവിശ്വാസവുമാണിന്ന്
പുതിയത് പഴയതാക്കീടുന്നു കാലം
പഴയത് പുതിയതാക്കാനായി മർത്യൻ
സ്വയമിടപെടുകയേ മാർഗ്ഗമുള്ളു,
സ്വയംനവീകരണം വ്യക്തി തൻ ശക്തി
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ