_________________________________________
ഉപഗുപ്തൻ കെ. അയിലറ
കാണുവാനാകാതെ മാറിന്റെയുള്ളിലായ്
'കാണുന്നോ'രത്ഭുതപ്രതിഭാസമാം മനസ്സ്
നിന്മനം ഞാൻ കണ്ടുവെന്നുചൊല്ലീടിലും
കാണ്മതുണ്ടാവില്ല നേരിട്ട,താം സത്യം!
മാറുപിളർന്നിട്ടുനോക്കിയാൽകാണ്മതോ
മാംസവും രക്തവും വെള്ളവുമല്ലയോ?
നെഞ്ചാണ് മനസ്സിന്റെയാവാസകേന്ദ്രമെ-
ന്നെന്തുകൊണ്ടാകുംമനുജൻചൊല്ലീടുക?
ഹൃദയം തന്നാണ് മനമെന്നും ചൊല്ലുന്നു
അതിലെന്ത് സത്യമുണ്ടെന്നതറിയില്ല
നിർമ്മലമാക്കിയിട്ടത് രക്തം തനുവിൽ
നിർലോഭമെത്തിക്കുമെവിടേം,അറിയാം!
ചിന്തതന്നല്ലയോ മാനസമെന്നതും
ചിന്തിക്ക വേണ്ടുന്ന കാരിയമല്ലയോ
എന്തിനു ചിന്തിക്കവേണമെന്നാണെങ്കിൽ
എന്താണതിൻ രൂപമെന്നത് മറുചോദ്യം!
രൂപവും കാഴ്ചയുമില്ലാതെ കാലത്തിൻ
ചാപല്യമൊന്നുമേയേശിടാതങ്ങനെ
ആരുടേയും വരുതിക്കൊതുങ്ങീടാതെ
ആർക്കുമടിമപ്പെടാത്ത പ്രതിഭാസം!
എങ്കിലും സമ്മതിക്കാതെ തരമില്ല
എത്രയപരമാകുന്നതിൻ ശക്തിയും
വേഗതയുമതുപോലെയതിൻ കഴി-
വെല്ലാം തിരിച്ചറിഞ്ഞീടുവാനെന്നതും!
എത്രയോ ദൂരേയുള്ളിടമാണെങ്കിലു-
മെത്തിടുമാമാത്രയിൽമനം ചിന്തിക്കിൽ
എത്രശ്രമിച്ചാലും ഗഗനയാനങ്ങൾ
ക്കത്രയും വേഗത കൈവരിക്കാനാകാ!
മനസ്സെന്ന മാന്ത്രികച്ചെപ്പിന്റെ ശില്പി
മനുഷ്യനല്ലെന്നത് തന്നെയാം കാരണം
മാനസങ്ങൾ തമ്മിലടുത്താലെത്രയോ
മാനങ്ങളവയ്ക്കിടേൽ കല്പിതമാകാം
വെറുപ്പും സ്നേഹവുംദേഷ്യവുംസങ്കടോം
വിദ്വേഷവും പൊരേ,ലസൂയേം കുശുമ്പും!
എന്തൊക്കെഭാവഹാവാദികളാണെന്നോ!
എല്ലാമൊളിഞ്ഞിരിപ്പുണ്ടീ മനച്ചെപ്പിൽ!
രൂപമില്ലാത്ത മനസ്സും ബുദ്ധിയുമേ-
കോപനത്തോടെയൊത്തുപിടിച്ചെന്നാൽ
എന്തൊക്കെ നേടിയെടുക്കുവാനാകില്ല,
എന്നതൊരു തർക്കമില്ലാത്ത കാര്യമാം!
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ