(ദേശഭക്തി ഗാനം )
ഒരിക്കൽ നമ്മളെ ഭരിച്ചിരുന്നിതന്ന്യ നാട്ടുകാർ
ചരിത്രമാണതൊക്കെയെന്നാ
ലിന്നു നാം സ്വതന്ത്രരാം
കൈവരിച്ചൊരാ സ്വാതന്ത്ര്യം കൈവിടില്ലൊരിക്കലും,
കാവലുണ്ടതിർത്തികാത്തു
ധീരരാകും സൈനികർ
തുരക്കുവാനായവസരവും കാത്തു നിൽക്കയാണ -
തിർത്തിയിലായ് ലാക്കുനോക്കി പാകിസ്ഥാനും ചൈനയും!
പാകിസ്ഥാനതിർത്തിയിലിടക്ക് വന്നു നമ്മളെ-
പ്രകോപിപ്പിച്ചതിൻ ഫലം കൊടുത്തതോർമ്മയില്ലയോ?
പാകിസ്ഥാനെയന്നുനമ്മൾ രണ്ടുതുണ്ടമാക്കിയില്ലേ
പുത്തനൊരു രാഷ്ട്രം, ബംഗ്ലാദേശിനെ,
സൃഷ്ടിച്ചതില്ലേ!
നമ്മളുടെ നാവികരും കരസേനേം വ്യോമസേനേം
നമ്മൾതൻ കരുത്താണവർ ലോകോത്തരവീരരവർ
പോരേൽ ലോകത്തേതിനേം കിടപിടിക്കുമായുധവും
പോർവിമാനശേഖരവും യുദ്ധക്കപ്പലുമുണ്ടല്ലോ
കൊടുക്കുകില്ല മണ്ണൊരു തരിയുമാർക്കും നമ്മുടെ
കരുത്തരായ, ധീരരായ
സൈനികപ്പോരാളികൾ
കാവലുണ്ടവരിവിടെ കണ്ണിലെണ്ണയുമൊഴിച്ചു
കാത്തിടാനായ് നമ്മളേയും
ഭാരത മാതാവിനേയും
സ്വന്തമച്ഛനമ്മമാരേം മറ്റുപ്രിയപ്പെട്ടവരേം
എന്തിനേറെ, ഭാര്യയെയും മക്കളേയുമകന്നവർ!
നാനാജാതി മതങ്ങളിൽ നമ്മൾ വിശ്വസിച്ചിടുന്നു
നാനാവിധ സംസ്കാരത്തിലൊത്തു കഴിയുന്നു നമ്മൾ !
ഭാഷകളൊട്ടനവധി നാം 'പേശി'ടുന്നുവെങ്കിലും,
വേഷമെത്ര വ്യത്യസ്തമായ് ധരിച്ചിടുന്നുവെങ്കിലും,
നാനാത്വത്തിലേകത്വത്തെ കാത്തുസൂക്ഷിക്കുന്നു നമ്മൾ
നമ്മളുടെ ഐക്യമാർക്കും ഭിന്നിപ്പിക്കാനാകുകില്ല!
ലോകത്തിലെയൊന്നാമത്തെ ജനാധിപത്യമാം നമ്മൾ
ലോകം മൊത്തമുറ്റുനോക്കും
.ശ്രേഷ്ഠ രാഷ്ട്രമാണു നമ്മൾ
ഭാരതത്തിൻ പേരുകേൾക്കെ പൊങ്ങണം തിളച്ചു ചോര
ഓരോ ഭാരതീയന്റേയുമഭിമാനമുണരണം
കാണുകിലൊരു ജവാനെ, വന്ദനം കൊടുത്തിടേണം
കാവലാള,വർക്കുമേറെ അഭിമാനകരമത്!
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ