മണിമഞ്ജരി വൃത്തം

മഞ്ജരി വൃത്തത്തിൽ 

ഗണമാദിമം 

ലഘുമയമായെന്നാലോ മണീമഞ്ജരിയായിടും

കാലഗതി (വൃത്തം മണിമഞ്ജരി)

സുദർശൻ കാർത്തികപ്പറമ്പിൽ

---------------------------------------------------------

കൊടിയവിഷാദവും പേറിഞാനീജൻമ-

പ്പടവുകളോരോന്നും കേറിടുമ്പോൾ,

മിഴിരണ്ടിൽനിന്നും തുരുതുരെച്ചുടുബാഷ്പ-

മൊഴുകുന്നൂ,തെല്ലുംനിലച്ചിടാതെ!

കപടമാംലോകത്തിലൊരു നിഷ്കളങ്കമാം

ഹൃദയത്തിനല്ലെങ്കിലെന്തു കാര്യം?

വിപരീത ചിന്തകൾക്കല്ലോലഭിച്ചിടൂ

സപദി സൗഭാഗ്യങ്ങളേതുമേതും!

ഒരു ഗർഭപാത്രത്തിൽനിന്നു ജനിച്ചവർ-

ക്കൊരുമയില്ലാത്തതിന്നെന്തു ഞായം?

പരദുഃഖമെന്തെന്നറിഞ്ഞിടാത്തോരെ ഹാ!

നരനെന്നു ചൊല്ലുന്നതാരീമന്നിൽ

ജനിമൃതിതൻ സൂത്രവാക്യങ്ങളോരുവാൻ

മനതാരിനെന്നെന്നുമായിടേണം

ഇടനെഞ്ചിലിരുൾമൂടിയെത്രനാളിങ്ങനെ-

യടിവച്ചടിവച്ചു നീങ്ങിടുംനാം

പുലരിപിറക്കുമ്പോൾകാണുന്നതൊക്കെയും

കലിതുള്ളും കാഴ്ചകളല്ലി,യെങ്ങും!

മരണം വന്നരികെയണയുന്നനേരത്തും

ദുരയേറും കാഴ്ചകളല്ലിയെങ്ങും!

അറിയുവാനൊട്ടു മുതിരുന്നില്ലീലോക-

ത്തുറവാർന്ന സത്യങ്ങളാരുമാരും

നിയതിതൻ സങ്കൽപ്പസീമയെ വെല്ലുവാൻ

സ്വയമേവനാം തുനിഞ്ഞാൽ വിഫലം

തെളിനീലനഭസ്സുപോൽ മനസ്സിനെ മാറ്റുവാ-

നെളിമകൊണ്ടെന്നുംനമുക്കാകണം

സകലതും സകലർക്കുമെന്നുള്ള ബോധനം

സമഭാവത്തോടുള്ളിലുണ്ടാകണം

ഒരു മാതൃഹദയവിശുദ്ധി പകർന്നേവ-

മരിയ വിഭൂതിയിലാഴ്ന്നിടാത്തോർ,

നരകത്തിലേക്കല്ലോ ചെന്നുപതിക്കുന്നു,

പരിമിതിയില്ലാതതീവ ദൈന്യം.

-------------------------------------------------------------------------

സുദർശൻ കാർത്തികപ്പറമ്പിൽ

15.4.2024