. ഭൗമദിനചിന്തകൾ
ജീവജാലങ്ങൾക്കശേഷമൊരുപോലെ
ജീവിക്കുവാനുണ്ടവകാശം ഭൂമിയിൽ
സ്വാർത്ഥതയെന്നാൽ മനുജനെ ഭൂമിത-
ന്നസ്ഥിവാരംവരെതോണ്ടുവാൻ പ്രേരിപ്പൂ
മലിനമാക്കുന്നു ജലാശയമൊക്കെ
വലയുന്നു ജീവികൾ ജീവജലത്തിന്
മലകൾ കുന്നുകൾ വെട്ടിനിരത്തുന്നു
മഴയെയകറ്റിക്ഷണിപ്പു താപത്തെ
വയലുകൾ തൊടുകളെല്ലാം നികത്തി
വരിവരിയായിട്ട് വീടുകൾ കെട്ടുന്നു
കയ്യേറിടുന്നു നദിയുടെതീരങ്ങൾ
കായലുപോലും നികത്താൻ മടിച്ചിടാ.
നേർത്തോരുനദികളും കായലുമൊക്കെ
വീർപ്പുമുട്ടിഗ്ഗതികെട്ടൊടുവിൽ വര-
വേറ്റിടുന്നു പ്രളയത്തെപ്പെരുംമഴ-
വെള്ളമൊഴുകിപ്പോകാനിടമില്ലാതെ
കൊള്ളചെയ്തീടുന്നു സ്വന്തംതനയയെ,
പൊള്ളലാഭംനോക്കിച്ചെയ്യുന്നിതൊക്കെ.
അന്യമായ്ത്തീരവേ സ്വന്തമിടങ്ങളെ വന്യജന്തുക്കളെത്തീടുന്നു നാട്ടിലും!
ആഗോളതലത്തിൽനാമൊരോവർഷവും ആഘോഷമാക്കുന്നു പലദിനങ്ങളും
പാരിസ്ഥിതികം ജലം വനമിത്യാദി,
പോരെങ്കിലോ ഭൗമദിനം മുന്നിലെന്നും!
വേണ്ടത്രയവബോധമെന്നിട്ടുമെന്തേ ഉണ്ടായിടുന്നില്ല മനുജന്റെയുള്ളിൽ?
പരിസ്ഥിതിപ്രശ്നങ്ങളേറുന്നെന്നിട്ടും
പരിതപിച്ചിട്ടിനിയില്ലോരു കാര്യം.
ആരംഭിക്കേണ്ടിയിരിക്കുന്നവബോധം
ഒരോരോ വീട്ടിലുംനിന്നുതന്നാദ്യമായ്
പ്രകൃതിയിലേക്ക് മടങ്ങെന്നതേയൊരു
പ്രതിവിധിയെന്നതറിയൂ മനുജാ!
